8014 / 9133
262
er alle crêatûren, niht als crêatûren, mêr: crêatûren als got. In der
minne, da sich got inne minnet, dâ inne minnet er alliu dinc.
Nu wil ich sprechen daz ich nie gesprach. Got smacket ime selber.
In dem smacke, da sich got inne smacket, dâ inne smacket er alle
crêatûren. Mit dem smacke, dâ sich got smacket, mit dem smacket
er alle crêatûren, niht als crêatûren: mêr: crêatûren als got. In dem
smacke, dâ sich got inne smacket, in dem smacket er alliu dinc. Nû
merkent. Alle crêatûre hânt iren louf ûf ir hôheste vollekomenheit.
Nû bite ich iuch, daz ir vernement bî der êwigen wârheit unde bîiemer
wernder wârheit unde bî mîner sêle. Nû wil ich aber sprechen
daz ich nie gesprach: got unde gotheit hât underscheit als verre als
himel und erde. Ich spriche mê: der inner und ûzer mensche die hânt
alse verre underscheit als himel und erde. Got hât vil tûsent mîlen
dar obe. Got wirt und entwirt. Nû kum ich wider û mîne rede:
got smacket ime selber in allen dingen. Diu sunne wirfet ûz iren
liehten schîn ûf alle crêatûren, unde dâ diu sunne iren schîn ûf
wirfet, daz ziuhet si in sich unde verliuret doch niht ir schînlicheit.
Alle crêatûren verzîhent sich irs lebens ûf ir wesen. Alle crêatûren
tragent sich in mîne Vernunft, daz si in mir vernünftic sint. Ich
alleine bereite alle crêatûren wider zuo gote.
Wartent, waz ir alle tuont. Nû kum ich wieder ûf mînen inren
und ûf mînen ûzern menschen. Ich sihe an die lylien ûf dem velde
und iren liehten schîn und an ir varwe und an al ir bletter. Aber ir
swelge der ensihe ich niht. War umbe? Dâ ist der swelge in mir.
Aber daz ich spriche, daz ist in mir und ich spriche es ûzer mir. Alle
crêatûren die smackent irme ûzern menschen als crêatûren, als wîn
unde brôt unde fleisch. Aber mînen inren menschen ensmacket niht
als crêatûren, mer: als gâbe gotes. Aber mîn innerster mensche
ensmacket sie niht alse gâben gotes, mêr: als ie und iemer. Ich nime
ein beckin mit wazzer unde lege dar în einen Spiegel unde setze ez
under daz rat der sunnen, sô wirfet diu sunne ûz irn liehten schîn
ûzer dem rade und ûzer dem bodem der sunnen unde vergêt doch
niht. Daz widerspilen des Spiegels in der sunnen daz ist in der
sunnen. Sunne und er ist doch daz er ist. Also ist es umbe got. Got
ist in der sêle mit sîner nâtûre, mit sîme wesenne unde mit sîner
gotheit und er enist doch niht diu sêle. Daz widerspilen der sêle daz
ist in gote. Got unde si ist doch daz si ist. Got der wirt dâ alle crêa-tûren.
Gotes sprechen dâ gewirt got.